الام _ حامد زيد

قصيدتي زاد بعيوني جمالها
واخذت انقي بالمعاني جزالها

واكتب معانيها من الشوق والغلا
لامي وانا اصغر شاعر من عيالها

كتبتها في غربتي يوم رحلتي
لما طرالي بالسفر ماطرالها

امي وانا بوصف لها زود حبها
وان ماحكيت لها قصيدي حكالها

امي لها بالجوف والقلب منزلة
مكانة ماكل محبوب نالها

اقرب من ظلالي وانا وسط قربتي
وانا تراي اقرب لها من ظلالها

ماشافت عيوني من الناس غيرها
ولا خلق رب الخلايق مثالها

اغلى بشر في جملة الناس كلهم
واكرم من ايدين المزون وهمالها

اتبع رضاها وارتجي زود قربها
واللي طلبته من حياتي وصالها